Ancelotti duhet të largohet?

Titulli: Ancelotti duhet të largohet? Fri Oct 03, 2008 10:22 pm

Mediat italiane vazhdimisht po njoftojnë se stoli i trajnerit të Milant, Carlo Ancelotti, është 'i lëvizshëm' këto ditë, për shkak të krizës të cilën e ka skuadra kuqezi në këtë fillim sezoni pavarësisht transferimeve të shumta që ka bërë.

Edhe pse fituan Superkupën e Evropës dhe Kupën Botërore për klube, sezoni 2007/2008, ishte njëri nga sezonet më zhgënjyese për Rossonerët që prej kohës kur Silvio Berlusconi është president.

Vendi i pestë në Serie A në sezonin e kaluar dhe dy ndeshjet zhgënjyese në sezonin e ri, kanë bërë që mediat të diskutojnë nëse Ancelotti duhet apo jo të qëndrojë edhe më tutje në krye të Milanit.

Carlo Ancelotti pritej të largohet në qershor, mirëpo për befasinë e të gjithëve ai qëndroi. Nga ana tjetër Berlusconi ndau një shumë parash për të transferuar yjet, siç janë Gianluca Zambrotta, Mathieu Flamini, Philippe Senderos, Andriy Shevchenko, Marco Borriello dhe Ronaldinho. Ndërsa urdhrat për Ancelottin ishin të qarta, duhet ta fitojë Scudetton këtë sezon.

Mirëpo, sezoni i ri nuk do të mund të fillonte më keq për Diavolët. Humbën 2-1 në javën e parë nga skuadra e porsainkuadruar në Serie A, Bologna, ndërsa në javën e dytë u deklasuan plotësisht nga Genoa, duke humbur 2-0. Humbja ndaj Bolognas ishte mungesë fati, mirëpo ndaj Genoas Milani dështoi në të gjitha repartet. Mbrojtja u terrorizua nga Diego Milito dhe Andrea Gasbarroni, mesfusha nuk prodhoi asnjë kreativitet, ndërsa sulmi nuk ekzistoi.

Para ndeshjes me Genoan shtypi italian kishte njoftuar se çdo rezultat përveç fitores, do të thoshte shkarkim i Ancelottit. Megjithatë, zëvendëspresidenti, Adriano Galliani, ka deklaruar se pozita e tij është e sigurt, ai do drejtojë Milanin por duhet të fitojë.

Pyetja është: A do të kishte më shumë sukses kjo skuadër e Milanit me një trajner tjetër? (Duke mos harruar se Milani ka fituar dy tituj të Ligës së Kampionëve me Carletton, po ashtu ka qenë një herë në finale, në gjysmëfinale dhe në çerekfinale. Si dhe ka fituar një Scudetto.)